mánudagur, október 31, 2005

 

Öössss það er ritstífla einu sinni enn. Já ég burðaðist með tölvuna mína í skólann til að geta aldeilis nýtt mér rúma 5 tíma til skrifta en svo bara kemur ekkert af viti frá mér. Og hvað gera Danir þá? Jú jú rétt til getið hjá þér, þeir eyða tímanum og blogga í staðinn :Þ

Í dag er Hrekkjavaka í landi frelsisins og ber háskólasvæðið þess greinilega merki. Hér þrammar fólk um í búningum með hárkollur á leið í tíma í einhverri afar uppbyggilegri fagrein. Já og meira segja prófessorarnir eru í búningum! ég skal segja ykkur það.....ég held að hún langamma mín hefði ekki verið mjög hrifin af þessu uppátæki. Ég hef hins vegar lúmskt gaman af þessu en var bara ekki nógu vel vöknuð í morgun til að skella á mig hárkollu. Jamm ég vona að mér gangi bara betur að ári. Í tilefni Hrekkjavökunnar voru partý út um allt í Seattle um helgina og var okkur Sesamestrætisbúum boðið í eitt slíkt. Mikkirefur fór á kreik og ákvað að bregða sér i gervi sjóliða en ég hins vegar greip til endurvinnslunna og setti upp ljósu hárkolluna og kanínueyrnaspöngina frá því 2003. Með okkur í Morfeusi voru svo flugfreyja, flugmaður og dama sem mætti beint úr Húsinu á Sléttunni. Reyndar var það mál manna að daman hefði allt eins getað verið úlfurinn sem át ömmu og hafði klætt sig í föt hennar til að villa um fyrir rauðhettu. Já hér getið þið kíkt á þessar verur...ath þið verið að skrolla niður fyrir umfjöllunina um hanastél og tónleika til að sjá föruneytið.
Á meðan á þessu öllu stóð var BB bara heima að laga fyrirlesturinn sinn og pakka niður til undirbúnings fyrir Boston ferð á ráðstefnu.

Á laugardaginn var massívt slæpst í Sesamestræti svo lítið er hægt að segja frá þeim degi. Kannski einna helst skemmtilegt að monta sig af því að við horfðum á Fellowship of the Ring á veggnum með THX hátalarana tengda. Úúúfffff ég get svarið það ég hélt að Nasgúlarnir væru bara mættir í stofuna og varð alveg jafn hrædd og þegar ég sá myndina í bíó. Eins gott að Mikkirefur var þarna til að taka í þá ef illa hefði farið :Þ

Sunnudagur var miklu afkastameiri og verður hreinlega að viðurkennast að ég sat við lærdóm og skriftir í tæpa 6 tíma. Jú víst það er alveg satt! Þegar maður hefur verið svona duglegur þá er best að verðlauna sig og varð Law & Order: Criminal intent fyrir valinu. Hehehhe ég veit....aum verðlaun en samt.

Jæja best að hætta að slæpast,
Þar til næst, eina sem þú verður að gera er að ákveða hvað skal gera við tímann sem þér er gefinn! (Gandálfur í LOTR-Fellowhip of the Ring, þýð: Kúkkí)

posted by Big Bird a.k.a. BB 12:52 e.h.