sunnudagur, september 14, 2003

 

Haustið stoppaði stutt við og í morgun var komið glampandi sólskin. Verandi sú bjartsýnis manneskja sem ég stundum er snemma á morgnana ákvað ég náttúrulega að þetta væri bara gluggaveður. Hver hefur ekki brennt sig á því að fara létt klædd út í ískalt gluggaveðrið, já ekki ég allavega ekki í þetta skiptið.
Kappklædd í síðbuxum og siðermaskyrtu (slík hefur ekki verið notað hér ansi lengi) skrölti ég niður og út í garð. Það var bara eins og að ganga á vegg en ég gat varla verið þekkt fyrir að vera of heitt svo ég snæddi morgunmatinn í snarti úti og fór svo inn að kæla mig. Ég held ég geti alveg vanist því í september að þurfa að fara inn að kæla mig.

Í kvöld fórum við í mat til Radfordana til þess að kynnast nýju Íslendingum sem voru að koma eða það sögðum við þeim allavega. Aðalmálið var náttúrulega að komast í smá flís af íslenska london lambinu, malt og appelsín og grænar ora baunir, þvílík snilld. Við fetuðum hinsvegar í fótspor fyrri Sesamestrætisbúa og buðum upp á grillaðan lax með pestó, tja þetta gátum við barasta.

posted by Big Bird a.k.a. BB 2:18 f.h.

fimmtudagur, september 11, 2003

 

Það er komið haust í Seattle, hitinn komin niður í eins og 15 gráður og það var næstum því rigning í gær. Kannski ekki mikið haust en mér finnst bara allt eitthvað svo haustlegt. Skólinn hér byrjar ekki fyrr en um mánaðarmót sem er gott mál, ég hef sem sagt ennþá nokkra daga til þess að klára allt sem ég ætlaði að gera í sumar.
Það var heldur óskemmtilegur haustboði sem beið íbúum Sesamestrætis í gær morgun, eitthvað var Oscar að tauta um að það væri megn áfengislykt við framdyrnar. Ég tók það nú svona mátulega alvarlega enda nýskriðin framúr og viðbrögð mín því eitthvað í þessa áttina yea yea, what ever !!!
Þegar við bökkuðum Gandalfi svo út úr innkeyslunni sáum við fjóra vel ölvaða sómamenn vera eitthvað að öfundast út í þann fimmta sem bersýnilega hafði verið fyrstur til þess að finna sér svefnstað í skjólinu inná milli runnanna í garðinum. Þar kom skýringin á lyktinni.
En hvað gera bændur nú ?
Mér finnst eiginlega ekki hægt að hækka bara í sjónvarpinu til þess að yfirgnæfa hroturnar og varla er hægt að sprauta á þá vatni eins og þvottabirnina ? Þetta er ekki einfalt mál því einhverstaðar verða þessi guðsbörn að vera en helst ekki í garðinum hjá mér..................

Bíðum við ekki bara og vonum að það vandamálið hverfi að sjálfum sér eða ættum við að vera leiðinleg og biðja þá að sofa einhverstaðar annarsstaðar ? En þá breytist ég í leiðinda kerlinguna sem aldrei vildi leyfa okkur að leika okkur í garðinum.....leikið ykkur einhverstaðar annarsstaðar.

Að lokum vil ég bara segja ÁFRAM FH ÁFRAM FH !!!!!!!!!!!!!!!!!!

posted by Big Bird a.k.a. BB 6:44 e.h.